BRICS ramten thawh hona thuthlung thar an pawm

India kaihhruaina hnuaia BRICS ramte'n 3rd BRICS Transport Working Group (TWG) meeting, Inrinni liam taa Nagpura ṭhutkhawm an neihah thawh hona thutlung thar an pawm. BRICS ramten bungraw inthawn leh inkalpawhna ṭha zawk an neih theihna turin 'Resolution on infrastructure circularity and other areas' chu an pawm a ni.

Meeting hi union road transport and highways minister Nitin Gadkari-a'n a kaihruai a, BRICS member ram 11 a transport lama hotu liante an tel a ni. Ram hrang hrang minister rual kalkhawm hian lungrual takin BRICS ramten infrastructure, Sustainable Aviation Fuel (SAF), Transport Decarbonisation, Urban Mobility Hub, Logistics Supply Chain Cooperation leh BRICS Railway Research Network -a thawh ho an remti.

Ni li chhung awh BRICS ram inhmuhkhawmah hian ram hrang hrang aṭangin he meeting kaihhnawih hotu lian eng emaw zat an tel a, BRICS ram hrang hranga hnam zia rang hrang hrang in ang lo leh danglam tak tak intelkhawmna a ni tih tilang thei tur pholanna hun hman a ni bawk.

India chuan a chairmanship-na hnuaia BRICS rama thawktute inpekna chu lawmawm a tih thu sawiin, India pawhin BRICS hmasawnna rualkhai taka a kal theihna tura thuk zawka inpek a tum thu a sawi. He intawhkhawm kaltlang hian BRICS member ramte thawh hona leh mipui leh mipui inkara inpawhna ṭha zawk neihte an rel nghal a ni.