Ramri hnaiha mihring pun dan dik lo chu hriat chhuah vat tur: Amit Shah

Union home minister Amit Shah chuan Ningani khan New Delhi-a Land Border Districts' Superintendents of Police Conference-2026 a hmanpuinaah, ramri hnaiha dik lo taka mihring awm zat danglam thut leh mihring punna thleng ṭhin chu enfiah thuai tur leh, a bul thum aṭanga a ler thlenga enfiah vat zel a ṭul thu a sawi.

Home Minister chuan sorkarin raltlan leh phalna nei loa ram danga lut tur tam avanga ramri bula mihring pun dan pangngai lo thleng ṭhin chu khauh taka thunun a tum tlat tih sawiin, he thil zir chiang tur hian 'Demography Mission' pawh din a nih tawh thu a puang bawk. Ramri venhimna tikhauh tur hian prime minister Narendra Modi kaihhruai sorkar chuan 'quadrangular security grid' a siam a, hei hian venhimna hna chu a hma aia chak zawkin a siam a ni, a ti.

Amit Shah chuan sorkar thil tum ber chu proxy war, dan loa luh rukna, mahni duhdana anga thil kalpui tumna, ruihlo tawlhruk, smuggling leh drone hmanga beihna thleng thei laka ramri venhim a ni tih a sawi. He hna thawk tur hian ramri huama mi SP 119 -te chu an biala thil thleng ngaihven reng turin a chah a ni.

Sorkar laipui chuan India leh Myanmar ramri km 1,610-a thui, Rs vbc 31,000 senga hung a tum thu leh, Vibrant Villages Programme kaltlangin ramri hnaiha chengte pem kual tur venna leh, hmasawnna hna thawhna turin sorkar welfare scheme-te hman ṭangkai a nih tur thu a tarlang tel bawk.