PM Modi-a’n New Zealand a tlawh dawn

Prime minister Narendra Modi chuan nimin khan Australia-a ni thum chhung official visit a hman zawh hnu leh ram pathum a tlawh tawpna turin, New Zealand a pan zui nghal. He intlawhna hi New Zealand prime minister Christopher Luxon-a sawmna anga kal a ni a, kum 40 hnua India prime minister-in New Zealand a tlawh hmasak berna a ni ang.

PM Modi hi July 10-11 chhung hian Auckland khawpuiah a cham dawn a; a cham chhung hian PM Luxon nen ram pahnih inlaichinna, a bik takin sumdawnna, venhimna, zirna leh technology chungchanga hmasawnna tura thawh dun dan tur hrang hrangte an sawidun dawn a ni.

Modi-a'n a tlawh hma hian New Zealand PM Luxon chuan thuchhuah siamin, India nena inlaichinna chuan hmasawnna tharah a hruai thleng tih a sawi. April thlaa Free Trade Agreement (FTA) an lo ziah tawh zulzuiin, New Zealand thil thawn chhuah zaa 57 chu thawn chhuah leh hmasak ber aṭangin chhiah awm loa thawn chhuah a nih tur thu a puang bawk.

Modi pawhin a zin chhuah hma khan thuchhuah siamin, he a tlawhna hian India leh New Zealand inkara sumdawnna leh ram pahnih mipui inlaichinna awm sa te chu a tinghet zual dawn tih a sawi. Auckland-a a cham chhung hian sumdawnna lian enkawltu, infiammi te leh New Zealand-a awm India mi 300,000 rualte pawh a kawm nghal dawn a ni.