NMA-in monument kaihhnawih dilna ni 15 chhunga tifel turin hriattir

National Monuments Authority (NMA) chuan hmun hlui leh thil hlui venhim bikte sak ṭhat, chei ṭhat leh thuam ṭhatna tura hmalak tumte chu, hmalak phalna dilna hrang hrangte ni 15 chhung ngeia chingfel a, an hnena thawn zel turin state sorkar hrang hranga thuneitutute a hriattir. NMA hi Ministry of Culture hnuaia awm a ni a, hmun hlu venhimna tura phalna (NOC) pe chhuaktu thuneitu sang ber a ni.

NMA chuan hmun hma tlawha endikna leh report siam tlai avangin dilna tâng a tam hle ṭhin tih sawiin, hei vang hian dilnate a hun loa chinfel a ngaih phah ṭhin a ni, a ti. Official-te hnenah Ancient Monuments and Archaeological Sites and Remains (AMASR) Act, 1958 leh AMASR Rules, 2011-in a sawi angin hun bituk chu dik taka zawm tur a ni tih a hriattir bawk.

Advisory tihchhuahah NMA chuan hetiang dilna tihkhawtlai leh report theh luh tlai hian harsatna a thlen bakah, sorkar hmalakna 'Ease of Doing Business' leh 'Ease of Living' te thlenga a nghawng chhiat ṭhin avangin thuneitutute chu an hna kalpuiah thlir lêtna nei turin a ngen bawk. Logistics leh hmanrua, motor emaw surveyor emaw awm loh vang a nih pawhin thuneitutute hnenah hriattir zel tura tih an ni.