Congress-in UGC-NET paper leak vangin Pradhan-a ban leh NTA ṭhiah phut

Eptu party, Congress chuan June 30-a UGC-NET 2026 exam zawhna a put ru nia sawi chungchangah Nilaini khan sorkar laipui an bei zui leh a, union education minister Dharmendra Pradhan-a ban tur leh, examination buaipuitu National Testing Agency (NTA) ṭhiah nghal an phut.

Congress general secretary Jairam Ramesh chuan Ningani khan 'X' kaltlangin thuchhuah a siam a, June 30-a UGC-NET hnuaia Sociology paper exam-ah zawhna a put ru ngei nia zirlai ṭhahnem takin an sawi chu lungawi thlak loh hle a ni, a ti. Kumin May thlaa NEET-UG exam paper a put ruk hnu khan Education Minister hian pawi ti lo ni awm takin nakkum aṭang chuan computer based test (CBT) a thlak a nih tawh tur thu a puang zui ta zawk a ni, a ti.

Jairam Ramesh chuan exam kalphung leh a dante eng ang pawhin thlak mah se, paper leak leh thil dik lo a thleng reng mai chu prime minister Narendra Modi kaihhruai sorkar hnuaia Education Ministry inthlahdah vanga thleng a nih bakah, NTA hian an hna an tlin loh luat vanga buaina thleng a nih thu a sawi. Hei vang hian Education Minister hi a bang tur a ni a, NTA pawh hi ṭhiah nghal tur a ni tiin a tarlang.

Lok Sabha-a Leader of Opposition Rahul Gandhi pawhin Nilaini khan he thil thleng chungchangah hian Modi sorkar chu zirlaite hmakhua ngai lo leh hna thawk lo niin a lo sawisel tawh a ni. Kum zawnin zirlaite nuna nghawng pawimawh tak nei exam a 'scam' a thleng reng chung pawha sorkar laipuiin hre lo ang hmiaha a ngawih bo san reng mai chu thil mak leh pawi tak a nih thu a lo sawi tawh bawk.