CPI(M) in NFSA siamṭhat tumna an duh loh thu tlangaupui

Sorkar laipuiin National Food Security Act (NFSA) siamṭhat a tum mek chu Food Security Act tichhe thei tur a nih avangin hnukdawk leh turin Communist Party of India (Marxist) chuan sorkar a phut. CPI(M) Politburo chuan he thil hi mi rethei zawk tana pawi tur a nih thu an sawi a ni.

Commission for Agricultural Costs and Prices (CACP) chuan ration hmu thei tur zat hi 67% aṭanga 40%-a tihhniam a rawt a ni. Hei hian ram chhunga mi rethei zawng zawng a huam tel thei dawn lo tih hriain CPI(M) hian an thil duh loh chhan ber a nih thu an sawi.

CPI(M) hian sorkar hmalakna dang, ration buhfai leh thil danga direct cash transfer kalpui an tum pawh nasa takin an sawisel bawk. Hetianga kalpui a nih chuan eizawnna khaihlak theih lakah mipuite a chhawmdawl zo dawn lo tih sawiin, khawvel hmun danga an lo tih tawh dan en pawhin he ruahmanna hi a hlawhtling tawk lo tih an tarlang.

Politburo chuan prime minister Narendra Modi-a kaihhruai sorkar chu ram chhunga eitur tlakchhamna laka mipuite venhimna, 'Public Distribution System' (PDS) tichhe lo turin an ngen bawk. Ram chhunga ration sem ṭhin chu a aia rintlak leh chak zawk, mipui zawng zawng huap zo 'Universal Public Distribution System' zawnga kalpui zawk turin sorkar chu an phut.