BRICS ramte’n ruihhlo dona atan ‘Guwahati Declaration’ pawm

Assam khawpui Guwahati-a ni hnih chhung BRICS ram hrang hrangte leh anti-drug agency hotute ṭhutkhawmna chu nimin khan zawhfel a ni. He ṭhutkhawmah hian khawvel puma ruihhlo tawlhrukna leh ruihhlo hmansualna hluar chho zel laka an thawh ho dante tihṭhatna tur ‘Guwahati Declaration’ chu pawm a ni.

Inremna thar hnuaiah hian BRICS member ramte chuan ruihhlo tawlhru ṭhin pawlte thawhpui zawn chhuah leh, an chet danah thil rinhlelhawm chungchangah real-time intelligence leh chanchin inhrilh tawn zung zungna turin hma an la dawn. Hei hian ram hrang hrang inkarah leh ruihhlo dona kawngah hmasawnna a thlen beisei a ni.

He ṭhutkhawm hi India ramin BRICS Chairmanship a chelhna hnuaiah ‘Building for Resilience, Innovation, Cooperation and Sustainability’ tih thupui hmanga neih a ni.

Thuchhuah siamah, tunlai khawvel ṭhan zel rualin ruihhlo tawlh dante a changkang chho zel a, ruihhlo siam chawp (synthetic drugs), darknet hmanga ruihhlo zawrh leh tuipui lam kawng hmanga sumdawng ṭhin pawl lian tak takte an hluar chho hle a ni tih an tarlang. Hemi lakah hian technology thar leh digital tools te ṭangkai zawka hman a tul tawh thu an sawi.

India delegation hruaitu,Narcotics Control Bureau (NCB) director general Anurag Garg chuan khawvel pum ruihhlo laka a fihlim theih nana thawh hona rintlak leh chak tak siam a pawimawh thu a sawi a. Prime minister Narendra Modi leh home minister Amit Shah hruaina hnuaiah ruihhlo laka fihlimna tur, 'Zero-Tolerance Policy' leh Three-Year Roadmap (2026-2029) an hman mek thu a tarlang tel bawk.