India leh Japan-in naval radio antenna ‘UNICORN’ siam dun dawn

India leh Japan chuan thawh dunna thar hnuaiah tuihnuai indo lawng warship tana hman tur, ralthuam kah chhuah thup thei 'UNICORN' (Unified Complex Radio Antenna) naval antenna siam dun turin inremna an ziak fel ta. Hemi chungchang hi New Delhi-a neih, India-Japan Annual Summit vawi 16-naah tarlan a ni.

Prime minister Narendra Modi chuan he inremna hi ram pahnihte ralthuam siamna kawnga “kawng thar” hawngtu a nih thu a sawi. Japan prime minister Sanae Takaichi nena thuchhuah inṭawm an siamah, he ralthuam thar hian Indo-Pacific bial chhungah muanna leh himna thar a thlen a beisei thu an sawi.

He UNICORN antenna, NORA-50 tia hriat bawk hi tuihnuai lawng chhipa hmanraw hrang hrang awm te - radar, data link, leh inbiakpawhna hruite hmun khata dah a, a ruala an beih turte lak aṭanga thup vek thei tur khawpa siam a ni. He hmanraw thar hmang hian tuihnuai lawngte chu hmelma radar-ah an lang lo thei dawn a, an him phah hle dawn a ni. Philippines dawtah India hi he Japan ralthuam changkang hmangtu awmchhun a ni bawk.

'Make in India' tihlar nan he hmanrua siam hna hi India ram chhung ngeiah Bharat Electronics Limited (BEL) chuan Japan ralthuam siam thiamte nen an thawk ho dawn a ni.An thil siam chhuah hmang hian Indian Navy tuihnuai lawng tharte chu ralthuam changkang zawk leh hmuh chhuah harsa zawkah a siam chho dawn a ni.