Wayanad-ah leimin avangin mi 1 thi, chin hriat lohin mi 7 awm

Kerala-a Wayanad district-a tunnel laih hna thawhna hmun, Kalladi khaw bulah Thawhlehni khan leimin rapthlak tak a thleng a, mi pakhat a thih bakah mi dang pasarih chu chin hriat lohin an bo. Hliam tuar mi pasarih vel an awm bawk.

Leimin hi Anakkompoyil-Meppadi tunnel project thawhna hmun, Malappuram leh Wayanad district inkalpawhna tur kawng siamna Meenakshi lei bulah a thleng a ni. Tun hnaia ruahsur nasa leivung awm khawmte chu a tawlh nia hriat a ni. Leimin hian hnathawktu ṭhenkhat leh lirtheite eng emaw zat a chhilh a ni.

Kerala chief minister V.D. Satheesan chuan chhiatna thlenna hmun hi nimin khan a endik nghal a, contractor-te hnenah PWD Minister leh District Collector-ten helai hmuna leivung leh hnawmhnawk awm khawmte hi sawn tura an hriattir tawh thu sawiin, an sawn loh vanga he chhiatna hi thleng a nih thu a sawi. Hei vangin he chhiatna thleng hi natural disaster ni loin, mihringte thiam loh man-made disaster a ni, a ti.

Chhiatna thlen veleh tualchhung mite chuan chhan chhuah hna thawk nghalin mi pathum chu him takin an chhan chhuak a ni. Fire and Rescue Services, Police leh National Disaster Response Force (NDRF) team-te chuan chhanchhuahna hna an thawk nghal bawk. Chhiatna thlenna hmun hi thenfai nghal a nih theih nan sorkar chuan Minister pahnih, AP Anil Kumar leh T Siddique te chu a hmunah an tir nghal bawk.