Ram Temple donation tihchingpin thubuaiah mi 8 man

Uttar Pradesh-ah Ayodya khawpuia Ram Temple sakna tur sum thawhkhawm zinga tam tham tak tihchingpen nia sawi kaihhnawiha First Information Report (FIR) theh luh a nih hnuah, nimin khan FIR-a hming lang mi pariatte chu man an ni.

Mi pariat mante hi rukruk, mi dang rinna tichhia, inbumna leh inphiarrukna kalpuia puhin Bharatiya Nyaya Sanhita hnuaiah thubuai siamsak an ni. Man zingah hian Ram Janmabhoomi Teerth Kshetra Trust General Secretary Champat Rai lamhnai tak pawh a tel nia sawi a ni bawk.

FIR theh luha mi pariatte tarlante hi temple tlawhtuten sum leh thil hlu tak tak an thawhkhawm lo chhiar a, lo buaipuitute an ni. Official-te chuan temple chhunga bawm hrang hranga daha mi thil thawhkhawmte chu an lo tichingpen niin an sawi.

Uttar Pradesh-a eptu party-te chuan donation tihchingpen chungchanga FIR theh luha Ram Janmabhoomi Teerth Kshetra Trust General Secretary Champat Rai, Trust member Dr Anil Mishra leh temple construction in-charge Gopal Rao te hming sawilan tel a ni lo leh, Bharatiya Janata Party (BJP) in an hum tlat chhan an zawt let. Mahse, chief minister Yogi Adityanath chuan hemi chungchang chhui tura sorkarin a din, Special Investigation Team (SIT) report behchhana tih a nih thu a sawi thung.

Ram temple tana sum thawhkhawm tihchingpen sawi chungchang hi June 7 khan sawi chhuah a ni a, June 13 khan Shri Ram Janmabhoomi Teerth Kshetra Trust ngenna angin state sorkar chuan SIT a din a, anni hian June 23 khan sorkar hnenah report hmasa an theh lut tawh a ni. SIT thurawn angin Ningani zan khan FIR theh luh a ni a, nimin khan mi pariatte hi man an ni ta a ni.

FIR theh luh a nih hnuah Shri Ram Janmabhoomi Trust General Secretary Champat Rai leh trustee Anil Mishra chuan banna an theh lut nghal bawk.