Kolkata warehouse chima thi zat mi 15 an tling tawh

Kolkata-a Nilaini, June 24 chawhma dar 12:07 vela Taratala warehouse sak mek chung a chim avanga thi zat chu nimin June 26 khan 15 an tling tawh. Nimin vek khan he chhiatna thlenna hmun aṭang hian mi pathum chhan chhuah belh leh an ni a, damdawi-in panpui an nih hnuah an thi ve leh a ni.

Police-te chuan he chhiatna thlenna hmun aṭang hian mi 33 chhan chhuah an nih thu leh, hnathawk 15 an thih tawh bakah midang 18-te chu state enkawl health facility-a enkawl mek an ni tih an tarlang. He chhiatna thleng kaihhnawihah hian mi paruk man an ni tawh a, chung zingah chuan warehouse sakna hmun ram neitu, structural engineer leh Kolkata Municipal Corporation mayor hlui, Firhad Hakim hnuaia officer-on-special duty pawh a tel.

Chhan chhuah hna hi National Disaster Response Force (NDRF) ten an thawk a, Indian Railways hmanruate pawh hman niin, Indian Army-te pawh an thawk chhuak a ni. Chief Minister chuan khua in a zir chuan chhanchhuah hna hi thawh zawh vat a beisei tih a sawi.

Ningani June 25 khan Chief Minister chuan Kolkata Municipal Corporation huam chhung bakah, Rajarhat, Sonarpur, Baruipur leh Maheshtala-a project thawh mekte titawp lailawk turin thuchhuah a siam a, helai huam chhunga building sak tura ruahmante chu endik an ni dawn tih a sawi bawk.