Firfiak pawl dona atan BRICS ramte an pawimawh: PM

Brazil, Russia, India, China, leh South Africa ram telna, BRICS hnuaia National Security Advisers (NSA) ṭhutkhawm chu Nilaini khan neih a ni a, prime minister Narendra Modi chuan a telpui. PM chuan khawvel hmun hrang hranga firfiakte chetna do let turin BRICS ramten hna pawimawh tak an thawk thei a ni, a ti.

India chuan kuminah BRICS chair nihna chelhin, hemi hmang hian ram hmasawnna lam pan mek 'Global South' ramte tana hmasawnna kawng hawn sak leh khawvel hmun him zawka siam chu an tum ber a ni tih PM chuan a sawi lang bawk.

Tun hnaiah khawvel boruak a ralṭi chho hle tih sawiin, Modi chuan hetiang hunah hian BRICS ramte inrinna leh thawh hona a pawimawh lehzual a ni tiin, firfiakte do mai bakah, cyber security leh thiamna thar 'emerging technologies' hmanga inbumna thlengte beih let kawngah hma lak a ṭul tih a sawi.

BRICS NSA meeting hi ni hnih neih a ni a, khawvel huapa ei leh bar intodelhna, energy security, firfiakten thiamna thar an hman ṭhin laka invenna leh khawvel sik leh sa danglam laka himna tur kawng hrang hrang an sawi ho a ni. India National Security Adviser Ajit Doval chuan meeting kar lakah Russia National Security Council Secretary Sergei Shoigu chu hmuin, ram pahnih inremna hrang hrang neihte an thlirlet dun a ni.