India leh US-in sumdawnna thuthlung thar peihfel hnai

India leh US chuan ram pahnih inkara sumdawnna tihlenna tur, 'bilateral trade deal' pawimawh tak mai chu an ziakfel lek lek tawh tih US sorkar hotu pakhat chuan a sawi. He thuthlung hian India mipui vaibelchhe 1.4 chuangte leh sorkar tan sumdawnna kawng zau tak a hawn rualin, ram pahnihte tan hlawkna thlen ve ve tur a nih thu a sawi bawk.

US Deputy Assistant Secretary of State, Bethany Poulos Morrison-i chuan Thawhlehnia Capitol Hill-a thu a puanah, tun hnaia ram pahnih hotu liante inbiakna chuan rah ṭha a chhuah thuai dawn tih a lo sawi tawh a ni. Kumin February thla khan he thuthlung chungchang hi lo sawi tawh niin, tunah hian an inremna tur chu an hnaih tawh hle tih a tarlang.

Sumdawnna thuthlung thar ziahfel a nih hnuah India chuan America siam huan thlai, thil dang leh khawl chi hrang hranga chhiah lak chu a tihtawp sak emaw, a tihhniam sak emaw dawn a ni. Ram pahnihte hian kum 2030 thlengin sumdawn tawnna hi USD vbc 500 thlenga tihlen an tum bawk.

Hemi chungchang sawipui tur hian US Trade Representative Jamieson Greer chu India-ah a cham mek a, commerce minister Piyush Goyal nen New Delhi-ah inbiakna an nei tawh a ni. July 24 hmaa an inremna lailawk, 'interim trade pact' hi ziahfel hman an beisei thu thuneitutute chuan an tarlang.