Union Minister George Kurian a hna aṭangin bang

Union minister of state for minority affairs and fisheries, animal husbandry & dairying, BJP hruaitu hlun George Kurian chu Thawhlehni khan Rajya Sabha MP term a tawp hnuah a pianna, Kerala lama party tana hma la zui turin minister a nihna aṭangin a bang. A banna thehluh hi prime minister Narendra Modi-a thurawn angin president Droupadi Murmu chuan Constitution Article 75, clause (2) tlawhchhanin a pawmsak nghal.

Kum 65 mi, George Kurian-a Rajya Sabha term hi June 21 khan a tawp tawh a, party hotute chuan Rajya Sabha member thlan tharah khan candidate atan an dah nawn tawh loh avangin union cabinet aṭangin banna a thehlut ta a ni. Kurian hi Madhya Pradesh aṭanga Rajya Sabha MP atana thlan tlin niin, June 2024 khan PM Modi-a cabinet vawi thumnaah minister atan lak luh a ni. Union minister a nih hnuah Kerala Assembly inthlanah pawh a chuh a, mahse a chak zo lo.

George Kurian hi kum 1980-a BJP din a nih tirh aṭanga an party tana mi rinawm tak niin, Supreme Court advocate nilai a ni bawk. Kerala-a Kristian tlemte awmte nena inlaichinna ṭha siam tura BJP-in an thlan chhuah a ni a, tunah hian a pianna state-ah party dinhmun tihchak nan a thawk chhunzawm tawh thung dawn a ni.