Jaishankar leh Mongolia Foreign Minister-in thawh dunna thlirlet

External affairs minister S. Jaishankar chuan Thawhṭanni khan Mongolia khawpui, Ulaanbaatar-ah an ram foreign minister Battsetseg Batmunkh a hmu a, ram pahnih inkara hmasawnna hna hrang hrang thawh mek leh inremsiamnate an thlir let. Ram pahnih tlawha zin chhuak, Jaishankar chuan Mongolia hi a tlawh hmasa a, vawiin hian South Korea lam a pan leh ang.

Batmunkh nen an inbiakna chungchang hi Jaishankar chuan tarlangin, ram pahnih 'Strategic Partnership' ṭhangduang leh rintlak lantirtu a nih thu a sawi. Hmasawnna tura ruahmanna hrang hrang, thiamna tihhmasawnna, hnam ziarang, zirna, venhimna leh khawvel huap thawh honate an thlir dun thu a sawi a; mining, clean energy leh culture, defence leh security hna thawh kawnga hmasawnna thar neih theih dante an sawi dun tih a tarlang. India chuan Mongolia chu an 'third neighbour' leh spiritual partner a nih anga a thlawp tlat tur thu a sawi bawk.

EAM hian Mongolia president Khurelsukh Ukhnaa hmu bawkin, India president Droupadi Murmu leh PM Narendra Modi-te zahna leh chibai bukna a hlan nghal. President Ukhnaa-a'n nikuma India a tlawhna khan ram pahnih inlaichinna a tihthuk phah hle tih a sawi.

Mongolia-a Buddhist biak-in lian ber, Gandan Monastery pawh tlawhin a hruaitu lu Chief Abbot Khamba Nomun Khan Geshe Lharampa D. Javzandorj a hmu.Jaishankar hian Mongolia Parliament Speaker Sandag Byambatsogt, Education Minister L. Enkh-Amgalan leh President hlui N. Enkhbayar te a hmu bawk.

Jaishankar hian South Korea-ah foreign minister Cho Hyun a kawm dawn a, naktuka Jeju Island-a Jeju Forum for Peace and Prosperity neih turah thu a sawi bawk ang.