Indore-ah ni 5 awh tur BRICS meeting ṭan a ni

India-in a thlen, khawvel huapa ram hmasawn chak (emerging economies) 11 telna BRICS Agriculture Working Group (AWG) meeting chu nimin khan Madhya Pradesh-a economic capital leh India-a khawpui fai ber, Indore-ah neih ṭan a ni. He inkhawmpui hi ni nga chhung awh tur a ni a, ram hrang hrang aiawhte chuan khawvel huapa lo neih leh thlai thar nghawng thei thilte an sawiho dawn a ni.

Meeting hi 'Agriculture Working Group' hoin June 11 thleng an ṭhukhawm dawn a, nimin a meeting hmasa ber chu India-a Department of Agriculture and Farmers Welfare (DA&FW) Secretary Atish Chandra-a'n a kaihruai. Meeting hi chhunzawmin June 12 leh 13-ah BRICS ram hrang hranga Agriculture Minister-te an ṭhukhawm leh thung ang.

Ni nga chhung neih tur meeting hian thil tum lian tak tak a nei a, chungte chu—ei leh bar in todelh(food security), farmer welfare, nutrition, leh climate-friendly smart agriculture neihte a ni tih Union Agriculture Minister Shivraj Singh Chouhan chuan a sawi.

Kumina BRICS inkhawmpuiah hian ram 11—Brazil, Russia, India, China, South Africa, Egypt, Ethiopia, Iran, Saudi Arabia, United Arab Emirates (UAE), leh Indonesia-te an tel a. Madhya Pradesh sorkarin he kum 2026 hi 'Year of Farmer Welfare' puala a puan nen a in nang fuh hle a ni.