PM Modi-a'n kum 12 chhung a sorkar hlawhtlingna tarlang

Prime Minister Narendra Modi chuan nimin khan a kaihhruai sorkarin kum 12 chhung kaltaa hmasawnna hlawhtlingnate, hmasawnna hrang hrang leh mipui tana hmalakna liantham te a tarlang. PM chuan 'Kum 12 chhung a rintlak, hmasawn leh 'vantlang welfare' tiin social media-ah a tarlang a, sorkar scheme pawimawh tak tak hnuaia hmasawnna hmuhte a tarlang a ni.

Hmalakna tarlan zingah hian mirethei chanhai leh hmasawnna hna te a langsar hle a, mi vbc 81 chuang hnenah thlatin a thlawna ei tur pek a nih ṭhin thu a sawi. Hei bakah hian in hmun nei loa awm te tan PM Awas Yojana hnuaiah in maktaduai 4 chuang sak a ni tawh a, tui conection maktaduai 120 chuang leh toilet maktaduai 105 chuang siam a ni tawh bawk.

Ṭhalaite dinhmun chawikanna kawngah PM Modi chuan ṭhalaite zinga mi maktaduai 2 chuang hnenah skill training pek a nih tawh thu a sawi a, Mudra loan kaltlangin cheng vbc nuai 40 chuang sem chhuah a ni tawh bawk. Sorkar hmalakna avangin hna thar thawktu nuai 2.2 chuang an awm thar tawh bawk. Loneitute tana PM-Kisan Samman Nidhi hnuaiah pawh cheng vaibelchhe nuai 4.3 chuang pein, loneitu vbc 8 chuang hnenah Kisan Credit Card pek an ni tawh.

Hmeichhe dinhmun chawikanna aṭangin hmeichhia vbc 32 chuang Jan Dhan account-ah thlunzawm an ni tawh a, sipai hmeichhiate tan pawh permanent commission siamsak an ni. Hriselna kawngah mi rethei vbc 70 chuang hnenah Rs nuai 5 thleng a thlawna inenkawlna siamsak niin, rampum huapin vaccination coverage pawh 90% lai a tling tawh a ni.

PM Modi chuan ram mipui vbc 1,400 te hamṭhatna chu 'Nation First' tih thupui a neiin ṭhalai, hmeichhia leh loneitute dinhmun chawikanna kawngah theihtawp chhuah chhunzawm zel a nih tur thu a tarlang.