Union Education Minister a ban hma lungawi lohna lantir dawn : CJP

Cockroach Janta Party (CJP) founder Abhijeet Dipke chuan exam hrang hrang leh hnaruak laknaa thil dik tawk lo thleng lakah Union Education Minister Dharmendra Pradhan-a’n a mawhphurhna laa a banna a thehluh hma chu lungawi lohna lantirna chu an titawp dawn lo tih Pathianni khan a sawi.

New Delhi-a Inrinni liam taa Jantar Mantar hmuna an punkhawmna chu a hlawhtling hle tih sawiin, hemi ni hian mi 7,000 zet an tel a ni. Lungawi lohna lantirna hi ram pum huapin an la zual zel dawn tih a sawi bawk. Maharashtra-a a chenna hmun Chhatrapati Sambhajinagar a thlen hnuah chanchinbumite kawmin, Dipke chuan sorkar laipui chu ni sarih chhung hun an pek tur thu leh, hemi chhung hian Education Minister hi a bang lo a nih chuan ram chhung hmun hrang hrangah nasa zawkin nawrh an huaihawt chhunzawm dawn tih a puang a ni.

Lungawi lohna lantirnaah hian NEET, CBSE leh exam danga thil dik lo thlengte duh loin ṭhalai leh zirlai ṭhahnem tak an tel a, Delhi huam chhunga college-a zirlai eng emaw zatin an tel ve bawk. CJP thupuangtu chuan sorkar laipui hian Pradhan hi bantir a nih loh chuan an hmalakna chu a tawp mai dawn lo tih a sawi.