India leh Nepal-in ramri chungchang inbiakna hmanga chinfel tum

Nepal foreign minister Shisir Khanal chuan India nena ramri chungchanga innghirnghona awm ṭhin chu diplomacy hmanga chinfel an duh tih a sawi a, rilru zau tak pua hmachhawn a nih chuan harsatna chinfel theih loh a awm lo tiin a sawi. Foreign Minister hian Pathianni khan New Delhi-ah thuthar lakhawmtute hmaah he thu hi a sawi a ni.

Khanal chuan Kathmandu-a sorkar thar ding chuan India nena inlaichinna chu "Kum zabi 21-na geopolitcs boruak tibuai thei thlirna hmanga thlir an duh tawh lo" tih a sawi. Ram pahnihte hmasawnna leh chhawr ṭangkai tur kawng dik zawk thlira hma lak an duh thu a sawi.

Tun hnaia Nepal prime minister Balendra Shah-a’n India leh Nepal ramri chungchangah thil sawiin harsatna lian tham zawk a thlen mai hlauhthawnna a awm hnuah, he intlawhna hi neih a ni a. Harsatna engmah thup lo a, rilru thuhmun pua sawidun a nih chuan ramri buai pawh hi chinfel theih a nih a rin thu Khanal chuan a tarlang tel bawk.

Hemi rual hian India economic lama hmasawnna nasa tak chu fakin, khawvel hmaah India chu technology leh sumdawnna lama thiltithei tak a ni tih a tarlang. Nepal sorkar thar thuvawn chu thil thup nei loa hna thawh leh ram tana hmasawnna tak tak (economic transformation) thlen tir a nih thu tarlangin, he hmasawnna kawngah hian India chu thawhpui atan an thlang a ni tiin thuthar lakhawmtute hmaah hian a sawi.