India-ah 'World Environment Day 2026' hlawhtling taka hman a ni

Khawvel hmun hrang hrangah nimin khan 'World Environment Day 2026' hman a ni a, He ni pual hian Prime Minister Narendra Modi chuan ram mipuite hnenah duhsakna hlanin, sorkarin kum 10 kalta chhunga hma a lo lak tawhnate a tarlang. Kumin hian he ni puala theme atân “Inspired by Nature. For Climate. For Our Future” tih chu hman a ni.

Kumin hian Azerbaijan khawpui Baku chu Global Host atana thlan niin, hemi rual hian climate change laka hmalak dante chu uar taka inzirtir a ni. India rama hmun hring (green cover) a zauh belh dante leh nungcha hrang hrangte an pun dante chu a hlawhtlinna a tih thu PM Modi hian a sawi. PM chuan hemi rual hian ram hmasawnna tlo 'sustainable growth' neih a nih theih nâna ram leilung leh boruak venhim chu mipuite mawhphurhna a nih thu a sawi bawk.

Sorkar hmalakna an tarlan lai hian, opposition party lamin an lo sawiselna a awm ve thung a, Congress president Mallikarjun Kharge chuan sorkar thupui chu thlawpin duhsakna hlan mah se, rualkhai lo taka hmalakna a awm nia a hriat thu tarlang, hmasawnna hma chhuan a ramhnua leh ngawte tichhe lo tur leh ram leilung venhimna dante dah pawimawh turin sorkar chu a ngen thung a ni.

Environment Day hman a nih rual hian, sorkar pisa hrang hrang, zirlai naupangte leh tlawmngai pawlte chuan he ni puala intihsiakna hrang hrang buatsaihin, ramsa venhimna leh boruak chhia laka inven nan hnatlâng leh thing phun hna an thawh a ni bawk.