India leh UK-in critical minerals & maritime security-a thawh dunna thar siam

India leh United Kingdom (UK) chuan Ningani khan critical minerals, education leh maritime security kawnga thawhdunna thar hrang hrang an tlangzarh. Thawhdunna thar hi India External Affairs Minister S. Jaishankar leh UK Foreign Secretary Yvette Cooper te’n New Delhi-a inbiakna an neih hnuah an puangzar a, ram pahnihte hmasawnna tura ‘India-UK Vision 2035’ kalpui mek thlirletna nei nghalin West Asia dinhmun te pawh an sawiho a ni.

He intlawh hun chhung hian ram pahnihte chuan ‘UK–India Critical Minerals Supply Chain Observatory (GSCO)’ an din thar a; he hmalakna hi critical minerals lakchhuahna leh hmanrua hrang hrang siamchhuahna kawnga khawvel huapa himna leh zalenna a awm theih nana din a ni. He hmalakna atan hian UKP mtd 1.2 ruahman niin, IIT-Dhanbad te nen thawhhona neih a ni ang.

Tuipui himna(maritime security) lamah pawh ‘Regional Maritime Security Centre of Excellence’ din turin King’s College London leh National Maritime Foundation te chuan hming an ziak a, hei hian Indian Ocean biala ram hrang hrangte himna hna thawh nan a pui dawn a ni. Zirna lamah pawh hma sawnna awmin, University of Liverpool chuan Bengaluru-ah campus an hawnna tur phalna lehkha an hlan nghal.

UK Foreign Secretary Yvette Cooper hi Nilaini khan India lo thlengin, PM Narendra Modi pawh a kawm nghal a. PM Modi chuan ram pahnih thawhhona nghet tak hian hmasawnna thar tam tak a thlen belh zel a beisei thu a sawi. EAM Jaishankar pawhin India leh UK inlaichinna chu hmanlai thil chauh ni tawh lovin, tun hnu zela sumdawnna leh technology sang inrin tawnna kawngpui thar a nih tawh thu a tarlang bawk.