Kuwait airport beihnaah India mi pakhat thi

Iran leh US inkar boruak buai chho zel avangin Nilaini khan Kuwait International Airport chu drone leh missile hmanga beih a ni a, he beihna thleng avang hian India khua leh tui pakhat a thih bakah India mi eng emaw zat an hliam bawk. Thil thleng avang hian India sorkar chuan pawi a tih thu sawiin, mipuite laka hetiang tharum thawhna hi tawpsan turin a ngen nghal.

Kuwait-a India palai Paramita Tripathi chuan Nilaini zan khan Central Mortuary tlawhin, beihna vanga boral ta India mi ruang hi a hmunah a tlawh a, he beihna vanga hliam tuar, hospital hrang hranga enkawl mekte pawh tlawhin an harsatna tawh hrang hrangte a zawt fiah nghal. Tripathi chuan hliamte chu Embassy lam aṭangin theihtawpa ṭanpuina pek an nih tur thu leh an dinhmun te pawh uluk taka vil zui a nih tur thu a hriattir bawk.

India Embassy chuan boral ta chhungte chu be pawpin, an chhiat tawhnaah hian an tawrhpui hle tih an tarlang a, a rang lama a ruang hi India a thawn a nih theih nan Kuwait thuneitute nen thawkdunin hma an lak thu an sawi. Hliam tuar zinga mi 63 zet chu thuneitute sawi danin hospital hrang hrangah sem darh an ni a, an zinga ṭhenkhat chu lu a hliam na tak leh sockwave avanga hliam tuar an ni.

Hetih lai hian, India Ministry of External Affairs (MEA) chuan thuchhuah siamin, tualchhung mipuite leh mipui hmanrua (civilian infrastructure) beih a ni chu na taka a dem thu leh, he inbeihna hmun vela India mi awmte chu fimkhur taka awm tur leh bial chhunga India mission-te pawh inring renga awm turin a hriattir bawk.