PM Modi leh Venezuela acting President in kawm

Prime minister Narendra Modi leh India tlawha lo zin, Venezuela acting president Delcy Rodriguez te chuan Ningani khan New Delhi-a Hyderabad House-ah inbiakna an nei a, ram hnih inkara hmasawnna hrang hrang, a bik takin energy, sumdawnna leh investmet-a inremna siam chungchangte an sawidun.

Inbiakna hi West Asia buaina avanga khawvel huapa crude oil lakluhna in daih lohna awm laia thleng a ni. India chuan ram dang aṭanga bungrua a lakluh ṭhin chu titlemin, tun hnaiah Venezuela aṭanga oil lakluh hi a tipung nasa hle a ni. Kumin January thlaa US sorkarin Venezuela president hmasa Nicolas Maduro an hren hnu khan Delcy Rodriguez hian acting president mawhphurhna hi a la a ni.

Delcy Rodriguez hi Nilaini khan New Delhi lo thlengin, a rual hian an ram foreign affairs, economy and finance, science leh technology, communication and information, leh transportation lam hotu liante an rawn tel. External affairs ministry thupuangtu Randhir Jaiswal chuan he intlawhna hian India leh Venezuela inlaichinna a tinghet zual dawn hle tih a sawi.

India hi hman deuh khan Venezuela crude oil leisaktu ram lian ber pawl a ni ṭhin a, ni khatah barrel nuai 4 chuang zet a la lut ṭhin. Mahse, kum 2020 khan US-in hremna (sanctions) a hman tak avangin oil lakluh hi tawp san rih a ni a, mahse, tun hnaiah hremna hlih a nih hnuin India refiner-te hian an la lut thar leh ṭan a ni.