US-in India mi 30 dan lo a truck khalh an thawn kir dawn

US thuneitute chuan dan loa an ram chhunga lut a, commercial truck khalh ṭhin India khua leh tui 30 zet an mante chu India-ah an thawnkir dawn tih an puang. Heng mite hi thuneitute'n ‘Operation Checkmate’ an neihnaa an man te an ni. Thuneitute chuan he hmalakna hi an chhunzawm zel tur thu leh dan loa truck khalh ṭhinte chu ram pawn lamah thawn chhuah vek an nih tur thu an puang bawk.

Customs and Border Protection (CBP) tarlan danin, Arizona-a Yuma Sector-a border patrol agent-te chuan nimin piah mai khan "Operation Checkmate" hi an nei a, beihpui thlak kaltlang hian dan loa ram chhunga awm mi 52 zet an man a ni. An mi mante zinga mi 36 te hi truck (semi-trucks) khalhtu an ni a, hemi zinga mi 30 hi India mi niin, a dangte hi Mexico, El Salvador leh Russia mi an ni thung.

Heng truck khalhtu India mi man takte hian California, New York, Washington leh Virginia-a commercial driving license (CDL) te pawh an lo nei hman a, mahse, thuneitu lam chuan an hnathawh phalna ‘Employment Authorization Documents’ (EAD) an lo neih tawh thinte chu tunah chuan a thih tawh avangin hna an thawh hi dan phal loh a ni tawh tih an sawi.

Yuma Sector Border Patrol-a Acting Chief Patrol Agent, Dustin W. Caudle chuan he beihpui thlak hi kawngpui himna atan leh mipuite tana hlauhawm thlen thei laka chhanhimna tura hmalakna a nih thu a sawi. Tun hnai khan US-ah hian India aṭanga pem truck driver-te chetsual vangin mihring thi leh hliam tuar an tam phah hle a, hei hian mipui tana hlauhawm a thlen a ni, a ti.