PM-in khawlum lakah fimkhur turin mipui chah

Prime minister Narendra Modi chuan thla tina a neih ṭhin radio broadcast 'Mann Ki Baat' vawi 134-na thupui sawi lehin, sorkar department hrang hrangin inkaihhruaina an tihchhuah te ngun taka zawm turin mipui a hriattir. Kumin a ram chhung hmun hrang hranga khawlum a zual chhoh em avangin, mipuite chu tui in tam tur leh ni sa lakah fimkhur turin a chah.

Modi chuan khawlum lo thleng laka him nan tui in tam a pawimawh ber tih sawiin, pawn chhuah dawn pawha fimkhur taka inchei leh inbuatsaih a ṭul thu a sawi. Chu mai bakah, khawlum hian ramsa leh sava te thlengin a nghawng avangin mipuite pawhin thlai leh nungchate tui pe a pui ṭhin turin a ngen bawk.

Tthupui sawi dangah PM chuan ram chhunga tui hna vawn him leh tui humhalh hna thawk mektu tualchhung mi hrang hrang te a faka, chung mite chu sustainability kawnga entawn tlak an nih thu a sawi. Hemi rual hian kumin a ram chhunga theihai thar hlawk dan leh a thar chhuaktu lo neitute chu ram sum leh pai dinhmun tichangtlungtu an nih avangin an chhuanawm hle tih a tarlang.

Sports lam thlir telin, tun hnaia National Senior Athletics Federation Competition-a national record thar siamtu Gurindervir Singh leh Animesh Kujur te chu infiamna khawvela India hmatawng tur an nih thu sawiin a lawmpui thu a tarlang. Zirtirtu hming thang Girija Amma-i'n zirlaite tana sipai ṭanpuina a khawn khawm dante chu ram hmasawnna tura mipui thawhho hlutzia tarlangtu a nih thu a sawi lang bawk.