India-in Congo-a Ebola kai puihna tur damdawi thawn

Africa khawmualpuia Democratic Republic of Congo (DRC) leh Uganda rama Ebola hri (Bundibugyo strain) hlauhawm tak a len avangin, India sorkar chuan hri leng dona atan puihna tur hmanraw pawimawh leh emergency medical supplies a thawn. Africa Centres for Disease Control and Prevention (Africa CDC) chuan Nilaini khan India sorkar leh a mipuite thilpek hi Uganda-a an Regional Coordinating Centre chuan a lo dawn tawh thu an tarlang. India-in damdawi leh hmanrua a thawnte hi Ebola hrik hmuh chhuahna khawl (diagnostics), in enkawlna, hri laka invenhimna (PPE leh sanitization kits) leh a hmuna hri vanga damlote buaipuina hmanruate an ni a, hri lenna hmun hrang hrangah sem chhuah a ni ang.

World Health Organisation (WHO) chuan Ebola hri leng thar hi 'Bundibugyo virus' vanga awm a ni a, thla hnih thum kal ta thleng khan damdawi bik leh vaccine tur a la awm lo tih a tarlang. Ebola hri vei hi 1,000 chuang hmuh chhuah tawh niin, mi 220 aia tlem lo thihna a thlen tawh a, WHO chuan he hri hi 'Public Health Emergency of International Concern (PHEIC)' ah a lo puang tawh bawk.

He hri hi a darh chak avangin India sorkar chuan ram chhung mipui leh khualzinte fimkhur turin thuchhuah a siam nghal a, a ṭul tawp a nih loh chuan Congo, Uganda leh South Sudan ramahte zin lo turin a ngen. India ram chhunga lut tharte thlithlai turin airport leh lawng chawlhhmunahte screening khauh taka nei turin SOP siam a ni bawk a ni.