Amit Shah-a'n kar thum chhungin ramri hmun hrang hrang tlawh dawn

Union home minister Amit Shah chuan nimin aṭanga ṭanin kar thum chhungin Pakistan leh Bangladesh ramri vela hmun pawimawh hrang hrangte a tlawh dawn tih sorkar chuan a tarlang. A tlawh chhung hian Border Security Force (BSF) leh state sorkar hotulute nen ramri venhimna dinhmun an thlir ho dawn a ni.

Home Minister hian Thawhlehni khan Rajasthan-a Bikaner thlengin, sipaite awmna Sanchu border outpost a tlawh nghal. Hetah hian ‘Prahari Sammelan’ ah telin, hmeichhe sipaite hman tur barracks a hawng. Ningani khian Gujarat-a Bhuj leh ramri biala hmun khirh lai 'Harami Nala' bial a tlawh leh ang.

June thla chhung hian Bangladesh ramri lam a tlawh leh thung dawn a, June 5-ah Tripura ramri tlawhin, June 15-ah West Bengal ramri hmun hrang hrangte a tlawh leh dawn a ni. Tun hnaiah Amit Shah hian Pakistan leh Bangladesh ramri venhimna a khauh leh zual nan technology thar hmanga venhimna changtlung tak siam 'Smart Border Concept' hman thuai a nih tur thu a lo sawi tawh bawk.