India leh Canada-in kumin chhungin indawrna tihfel hman tum

India leh Canada chuan kumin hian zalên taka insumdawn tawnna tur 'Free Trade Agreement' (FTA) chu tihfel hman an tum thu commerce and industry minister Piyush Goyal chuan a sawi. He hma lakna hian ram pahnihte inkar sumdawnna chu nasa takin a tihhmasawn chhoh beisei a ni.

Piyush Goyal chuan Canada prime minister Mark Carney nena an inbiak hnuah, ram pahnih prime minister-te chuan, kumin tawp hma ngeia he indawrna hi tluang taka tihfel a nih theihna tura mawphurhna an pek thu Canda trade minister Maninder Sidhu nena joint press conference an neihah a sawi. Ram pahnihte insumdawn tawnna, USD tld 17 hu ni mek chu kum 2030-ah USD tld 50 ($50 billion) tling tir tum a nih thu a tarlang.

Ottawa khawpuiah ram pahnih aiawhte chuan 'Comprehensive Economic Partnership Agreement' (CEPA) tifela indawr tur hian ṭhutkhawm vawi thumna an nei a ni. Kum 2023 kuma Sikh activist pakhat thihna kaihhnawihah ram pahnihte inkar a chhiat hnuah, kumin February thlaa Canada PM Carney-a'n India a rawn tlawh aṭang khan an inlaichinna pawhin ṭhat lam a pan chho ṭan a ni.

India ram aṭanga Canada-a thawn chhuah tam berte chu damdawi, thir leh thirzai, incheina puante leh electronic thil te an ni a; Canada aṭang hian dal chi hrang hrang, lunghlu leh thildangte lak luh a ni thung. He indawrna hian hma a sawn zel chuan sumdawnna leh hmasawnna kawngah ram pahnihte tan kawng thar a inhawng dawn a ni. Canada ramah hian India mi, zirlaite huamin nuai 4.25 vel an awm.