Delhi-ah Quad Foreign Minister meeting nei; Critical minerals leh energy lamah hma la dawn
India ram khawpui New Delhi-ah Thawhlehni khan ram pali - Australia, India, Japan leh US telna 'Quad' (Quadrilateral Security Dialogue) Foreign Minister-te an ṭhukhawm. He hunah hian Indo-Pacific bial chhunga China chet velna thunun a nih theih nan critical minerals, energy security leh tuipui lam venhimna kawnga thawh hona thuk zawk neih chungchang an rel.
He ṭhutkhawm pawimawh hi India external affairs minister S. Jaishankar kaihhruaina hnuaiah neih niin, US secretary of state Marco Rubio, Australia foreign minister Penny Wong, leh Japan foreign minister Toshimitsu Motegi te an tel a ni.
Ṭhutkhawm zawhah hian thuchhuah intawm siamin, khawvel thiamna thar (AI) leh a hmanraw siamna atana pawimawh 'Critical Minerals Framework'-a thawh hona thar tur an tlangzarh nghal. Hei hi China-in rare earth elements leh strategic metals a thununna aṭanga inthiar fihlimna atana hma lakna thar an siam a ni. India leh US chuan rare earth minerals lak luhna turin thawh dunna tur ruangam, bilateral framework thar an ziak bawk.
Quad ramte chuan 'Indo-Pacific Energy Security Initiative' leh tuipui lama inbeihna tihrem nan 'Indo-Pacific Maritime Surveillance Cooperation Initiative' pawh an puangzar nghal. Fiji-ah lawngchawlh hmun tihhmasawnna tur thawk dun turin 'Quad Ports of the Future Partnership' hnuaiah hma an la dawn bawk a ni.
China chet dan sawisel
Quad hruaitute chuan thuchhuah siamin, East China Sea leh South China Sea-a tharum thawh tumna leh inbeihna awm ṭhin chu pawi an tih thu an sawi. Lawng veivakte zalenna tibuai zawnga eng ram pawhin thuneihna lekkawh an tumna chu an thlawp lo tih tarlangin, hming hmerhin sawi lang kher lo mah se China lakah an lungni lo hle tih an lantir.
Hemi rual hian West Asia boruak avanga buaina awm, Strait of Hormuz-a sumdawnna lawng veivak tibuai zawnga Iran-in chhiah (toll) a la ṭhin pawh pawi an tih thu an tarlang bawk. EAM S Jaishankar chuan Indo-Pacific bial chu khawvel hmasawnna thlentu a nih zui zel theih nan rintlak leh lang tlang taka thawh hona neih a pawimawh thu a sawi a ni.