India leh US in trade deal siamṭha turin hma la mek

India leh US chuan ram pahnih tana hlawkna thlen thei tur leh daih rei tur, mi tam takin an lo nghah tawh "Trade Agreement" siam fel thuai turin hma an la mek. Ni li cham tura India rawn tlawh mektu, US secretary of state Marco Rubio chuan inbiakna hian ram pahnih inlaichinna a tinghet zual dawn a ni, a ti.

External affairs minister S. Jaishankar nena New Delhi-ah inbiakna thuk leh zau tak an neih hnuah Rubio chuan he thu hi a puang a ni. An inbiaknaah hian sumdawnna khawvel chauh ni lo, critical minerals, energy leh defence lam thlengin thawh dun dan tur an sawidun a ni.

Thuthar lakhawm tute hmaa thu a sawiah Rubio chuan, "Hma kan sawn nasa hle a, ram pahnih tan thui tak daih tur leh hlawkna thlen thei tur inremna kan siam thei thuai dawnin a lang," a ti. US sorkar chuan sumdawnna kawnga chhiah inlak tawnna awm ṭhinte chu siamrem a, ram pahnih tana rualkhai zawnga herrem a duh thu a sawilang bawk.

Inremna tihfel a nih thuaina tur hian US aiawh trade delegation-te pawh India-ah an rawn kal thuai dawn thu tarlan a ni a, ram pahnih sumdawnna nasa taka tihlen a nih thuai beisei a ni.