Punjab-ah ui seh vanga hliam tuar an tam avangin ‘No-Go Zones’ siam dawn

Punjab-a khawlai ui kawlh seh vanga hliam tuar an pun chhoh avangin, Punjab sorkar chuan mipui punkhawmna hmun hrang hrangah ui vakvai luh phal lohna hmun ‘No-Go Zones’ siam a tum. He thutlukna hi Supreme Court-in khawlai ui thunun nana thupek a lo chhuah tawh bawhzuina niin, Punjab Local Government Department chuan ui vakvai leh ran vakvel dangte luh khapna tur hmun pawimawhte thlang chhuakin hma a la ṭan.

Sorkar thuchhuah tarlan danin, he hmalakna thar hnuaiah hian vantlang hmun pawimawh, naupang leh kum upate tana hmun hlauhawm thei leh zirna in, damdawi in, sport centre, bus stand leh rel chawlh hmunte chu ui luh phal lohna hmun atan siam a ni dawn a, kumin chhung ngeia kalpui tura ruahman a ni. He khapna hian kawngpuia ran tlate vanga chetsualna thleng ṭhin ven nan highway pawh a huam tel dawn bawk.

Punjab-ah hian ui seh hliam hi nikum 2025 chhung khan nuai 3.34 zet an tling a, kuminah thla li chhungin ui seh hi nuai 1.37 an awm tling tawh bawk. Nitin ui seh report hi 1,100 chuang zet a tling ziah a, hei hian mipui himna a ti derthawng hle a ni. Punjab chief minister Bhagwant Mann chuan mipui, a bik takin naupang leh kum upate zalen taka an chhuah theih nan Supreme Court thupek hi eng tik lai pawha zawm a nih tur thu a sawi.

Hmalakna kalpui tur hian state chhung district 23-ah Animal Birth Control (ABC) centre-te siam belh tum a ni bawk. Ui kawlh leh natna benvawn nei tawhte chu Supreme Court kaihhruaina ang zela tihhlum (euthanasia) phalsak an ni bawk a ni. Ruahmanna thar kaihhruaina chipchiar hi sorkar chuan tunkar hian a tlangzarh ang.