Sansad Ratna Awards dawng tur thlang fel ta

Kumin chhunga Parliament session hrang hranga che ṭha leh thawh hlawk, Member of Parliament (MP) 12 leh parliamentary committee pali (4) te chu 'Sansad Ratna Awards' dawng turin thlan chhuah an ni. Chawimawina dawng turte hi Prime Point Foundation chuan a puang a ni.

Mimal lawmman dawng tur zingah hian rorellai party lama hruaitu hriat hlawh tak tak an tel a, BJP hruaitu Jagdambika Pal , P.P. Chaudhary, Nishikant Dubey leh Shiv Sena MP Shrikant Eknath Shinde te chu thlan chhuah zingah an tel. Uttar Pradesh, Rajasthan, Maharashtra leh Gujarat aiawh MP eng emaw zat pawh che ṭha lawmman dawng tur hian thlan an ni bawk.

Mimal bakah hian Parliament hnuaia hna pawimawh tak tak thawk ṭhin, Standing Committee pali pawh chawimawina hlan tur hian thlan an ni. Charanjit Singh Channi-a kaihhruai 'Committee on Agriculture' , Bhartruhari Mahtab-a hnuai ami Finance Committee, Saptagiri Sankar Ulaka kaihhruai Rural Development and Panchayati Raj Committee leh Anurag Thakur-a kaihhruai Coal and Mines Committee te an tel a ni.

Kumin Sansad Ratna Award dawng tur zinga langsar zual bik, Jagdambika Pal leh Charanjit Singh Channi te hi chief minister lo ni tawh ṭhin an ni a; Narhari Amin pawh Gujarat-ah deputy chief minister a lo ni tawh bawk.

He chawimawina hi Prime Point Foundation hian kum tin Parliament-a zawhna zawt hnem, thupui sawi honaa sawi hnem leh Private Members' Bill luh pui hnem, MP hna thawk ṭha bikte hnenah hian an hlan ṭhin.