US Secretary of State Marco Rubio-a'n India tlawh dawn

US secretary of state Marco Rubio chuan a vawi khatna atan May 23 & 26 inkar hian India a rawn tlawh dawn tih US State Department chuan an puang. He intlawhna hi tun hnaia Persian Gulf biala US leh Iran inkar buaina lian tak chhuak, India ram mamawh energy security nghawng pawi thei nena hmehbel a nih avangin khawvel hmun hrang hranga politics watchdog-te chuan an ngaihven hle.

A cham chhungin Rubio chuan India sorkara mi pawimawhte a hmu dawn a; oil lak luhna chungchang te, ram pahnih inkar sumdawnna leh venhimna (defence cooperation) tihchakna chungchangte a sawipui ang. India a lo thlen hmain Sweden-ah NATO Foreign Ministers ṭhutkhawmah a tel hmasa dawn a ni.

US Embassy chuan thuchhuah siamin, kumin hi America ramin zalenna a hmuh kum 250-na a nih thu leh, khawvela democracy ram sorkar lian ber India nena lawmna hman an chak thu an tarlan bakah, Rubio-a'n India a rawn tlawh chhung hian Quad ministerial ṭhutkhawm pawh neih thuai a nih tur thu an tarlang bawk.

Secretary of State hian New Delhi bakah Kolkata, Agra leh Jaipur-te a tlawh dawn a, Kolkata a tlawh tur hi kum 14 hnua US Secretary of State-in he khawpui a tlawh lehna hmasa ber a ni. West Bengal Chief Minister thar Suvendu Adhikari bakah Mother Teresa din, Missionaries of Charity inkhawmna hmunte pawh a tlawh dawn nia sawi a ni.