TN-ah Congress-in TVK zawm, ṭangrual sorkar a ding

Tamil Nadu-a Tamilaga Vettri Kazhagam (TVK) party hotu leh chief minister C. Joseph Vijay-a kaihhruai sorkar chu Congress party in a zawm ta. Tamil Nadu-a ṭangrual sorkar a dinna hmasa ber a ni.

Congress hi kum 59 chhung ngawt Tamil Nadu-ah hian thuneihna an chang tawh lo a ni. Kumina assembly inthlanah khan seat 5 an la a ni. Inthlana party mala seat la hnem ber, TVK party-in sorkar siamna khawp seat an hmuh tlin loh hnuah, Congress hian ṭangrual sorkar a din theihna turin an thlawp tih Congress national general secretary (organisation) KC Venugopal chuan a puang. Nimin vek khan Congress MLA pahnih chu minister atan lak luh an ni nghal bawk.

TVK hotu Vijay chu May 10 khan Chief Minister atan lak luh a ni tawh a, nimin khan a kaihhruai sorkar hnuaia minister atan Congress MLA pahnih telin mi 23 lak luh thar an ni. A hmain minister atan mi 10 lak luh an lo ni tawh a ni.

CM Joseph Vijay chuan minister tharte chu lawmpuina hlanin, TVK leh Congress chu mipui ṭhatna turin lungrual takin an thawk ho dawn tih a sawi. TVK hian VCK leh IUML party-te pawh an kaihhruai sorkara council of minister-a tel tur hian a sawm bawk.