Indo-Pacific zalenna atan India leh Vietnam thawk dun dawn

India leh Vietnam chuan Indo-Pacific bialah thawhdun zui zel an tum thu an puang a, thiamna thar artificial intelligence (AI) leh quantum technology lamah inremna thuthlung (MoU) an ziak bawk.

India defence minister Rajnath Singh leh Vietnam defence minister General Phan Van Giang te chuan Thawhlehni khan Hanoi khawpuiah buaina chhuak thei laka venhimna chungchang chipchiar takin an sawi dun. An inbiaknaah tuipui lam venhimna (maritime security), ralthuam siamna lama thawhdun te, leh sipai training hona te, cyber security leh UN peacekeeping operation-te an sawi a ni.

Defence Ministry tarlan danin, ram pahnihte hian khawvel leh ram bial chhunga venhimna dinhmun an hmuhdan leh ngaihdan an inhrilh tawn a; Indo-Pacific bial chhunga inremna, hmasawnna leh lawng veivakte him taka an kal theih nana hmalak a pawimawh thu an tichiang bawk. Hemi atan hian inbiakna neih ṭhin leh sipai joint exercise neih fo pawh an remti bawk.