India leh Italy-in thawh dunna thuk zawk nei dawn

Italy tlawha zin, prime minister Narendra Modi leh Italy prime minister Giorgia Meloni te chuan nimin khan ram pahnih inkara thawhdunna thuk zawk neih chhunzawm zel a nih tur thu an puang.

PM Modi hi May 15 khan ram panga - UAE, Netherlands, Sweden, Norway, leh Italy te tlawh turin a zin chhuak a, Thawhlehni khan a tlawh hnuhnun ber tur Italy hi thlengin, PM Meloni nen an inkawm a ni. Italy president Sergio Mattarella pawh a hmu bawk.

Modi leh Meloni chuan ram pahnihte thawh dunna hian sumdawnna, technology, energy, space, leh security te a huam a, tun hnaia rawn lar thar "Indo-Mediterranean corridor" thlir chungin hma lak chhunzawm an tum a ni. Kum 2029 ah ram pahnih inkara sumdawnna chu a tlem berah euro tluklehdingawn 20 tlin hman tir an tum bawk. India leh Italy chu khawvel economy hmun pawimawh pahnih, Indo-Pacific leh Mediterranean region a awm an nih thu tarlangin, hêng bial pahnihte hi thil hrang anga thlir chi a nih tawh loh thu an sawi.

India-Middle East-Europe Economic Corridor (IMEC) chu an duhthusam tihhlawhtlinna atana hmanraw pawimawh a nih tur thu leh, he thil hian infrastructure, digital networks, leh energy system-te a phuarkhawm thei dawn tih hruaitu pahnihte chuan an sawi. G20 Summit kum 2023 a neihah khan he corridor chungchang hi sawi lo ni tawh mah se, tunah hian a taka hma lak zui nan ram pahnihte hian ṭan an la thar a ni.

Thawh dunna hian tunlaia hmasawnna thar Artificial Intelligence (AI) leh Digital Public Infrastructure te pawh a huam tel dawn bawk. AI chu Global South tana hmasawnna thlentu hmanrua a nih rualin, mihring dikna leh zalenna rahbi thar siamtu a nih theih nan, Italy-in G7 Presidency a chelhna hnuaiah leh Delhi-a AI Impact Summit 2026 neih zawh taka inremna siamte thlirin hma an la zui dawn a ni.