Bengal-in sakhaw pawl bil puihna pek ṭhin titawp dawn

West Bengal cabinet meeting, chief minsiter Suvendu Adhikari hoa Thawhṭannia neih chuan sakhaw kaihhnawih pawl, imam leh a dangte hnena ṭanpuina sum pek thin chu titawp turin thutlukna a siam. Cabinet hian hnam hnuaihnung bik tana 'OBC list' hman lai mek chu ṭhiah vek a ni dawn tih a puang bawk.

Women, child, and social welfare minister Agnimitra Paul chuan cabinet thutluknate hi June 1 aṭanga hman ṭan vek a nih tur thu a sawi. Sakhaw mila sum leh pai sem ṭhin tih bo a nih rual hian, zirlai naupangte hnena scholarship sem ṭhin erawh a ngai anga kalpui a nih tur thu a sawi.

OBC list ṭhiah hi kum 2024-a Calcutta High Court thutlukna siam tawh zulzuia kalpui a ni. Sorkar chuan he quota hnuaia dik taka tel turte thurawn petu tur panel thar a din nghal bawk. State sorkar hian hmeichhiate tana financial support scheme thar, ‘Annapurna’ chu a tlangzarh nghal a, sorkar hnathawkten 7th pay an hmanna tur ngaihtuah turin Seventh Pay Commission din chu cabinet hian a pawm bawk a ni.