India leh AU thawk dun dawn

India-Africa Forum summit, New Delhi-a neih tur kaihhnawihah African Union (AU) chuan ram hrang hranga hri leng lakah khawvel pum ṭanrual a ngai tih sawiin, hmachhawn tur thar lakah India nena thawh dun chu a pawimawh hle dawn tih an tarlang. Hei hi tun hnaia Democratic Republic of Congo (DRC) leh Uganda rama Ebola hri leng darh mek chungchang avanga an tihchhuah a ni.

World Health Organization (WHO) chuan he Ebola hri darh mek hi khawvel pum tana pawi thei Public Health Emergency of International Concern (PHEIC) tiin a lo puang tawh a ni. AU Commission Chairperson Mahmoud Ali Youssouf chuan thawh hona hmangin he harsatna hi an hneh ngei a beisei thu a sawi.

Ram hrang hrang aṭanga palai sang tel kalkhawmna tur, India-Africa Forum Summit (IAFS-IV) chu kumin May 28-31 chhungin New Delhi-ah neih tura ruahman a ni. AU spokesperson Nuur Mohamud Sheekh chuan Ebola hri leng hian summit hi a tibuai lo ang tih sawiin, biotechnology leh hriselna lama India hmasawnna chu Africa tana entawn tur leh innghahna tlak a nih thu a sawi tel bawk.