ECI-in SIR phase III kalpui leh dawn

Election Commission of India (ECI) chuan ram chhunga voter list ennawnna, Special Intensive Revision (SIR) Phase-III chu kumin hian state leh Union Territory (UT) 22-ah kalpui a tum thu a puang. SIR hi tun hnai khan state pariat leh UT panga-ah hlawhtling taka kalpui a lo ni tawh a ni.

Bial hrang hranga SIR kalpuina tur huam chhungah hian voter vbc 40 vel zet an awm. State hrang hrang - Kerala, Assam, Puducherry, Tamil Nadu leh West Bengal-ah te Assembly election neih a nih avangin he hna hi a khaihlak deuh a; mahse, inthlan zawh a nih tawh avangin hun rei loteah ṭan leh thuai turin an ruahman.

SIR Phase-II ah khan voter vbc 50 chuang zet enfiah an ni tawh a, chutah chuan mi nuai 60 chuang, thi tawh si voter list-a la awm rengte chu paih an ni. A bik takin Uttar Pradesh leh West Bengal-ah mitthi tawh, list-a awm paih an tam hle. Ram pum huapa voter list felfai leh dik neih a nih theih nan he hna hi a pawimawh hle tih ECI official-te chuan an sawi.

Special Intensive Revision hian electoral roll-a dawt hmanga hming chuang leh awm tawh lo hmingte zawn chhuah chu a tum ber a ni. Tunah hian state hrang hrang, Andhra Pradesh, Maharashtra, Karnataka, leh Mizoram telin state 17 leh UT 5-ah he hna hi ṭan leh nghal tura inbuatsaih mek a ni. ECI chuan he hna hi kumin June ral hma ngeia zo hman turin Chief Electoral Officer hrang hrangte a hriattir tawh a ni.