WB CM hoa cabinet meeting hmasa berin project 6 pawm nghal

West Bengal chief minister thar, Suvendu Adhikari chuan Inrinni liam ta khan Nabanna-ah cabinet meeting hmasa ber a ho a, state hmasawnna tura pawimawh project paruk an pawm nghal.

Meeting zawhah thuthar lakhawmtute kawmin, CM thar chuan sorkar hmasain a lo kalpui tawh 'social welfare scheme' engmah tihtawp a nih dawn loh thu a sawi. "Mipui tana ruahmanna ṭha lo awm tawh sate chu kalpui chhunzawm zel a ni ang. Chutih rualin sorkar laipui scheme hrang hrangte pawh state chhungah chak zawka kalpui a ni tawh dawn a ni," a ti.

Cabinet meeting-a pawm pawimawh tak pakhat chu Bangladesh nena inrinaa Border Security Force (BSF) te'n hungna (fencing) an siamna tura ram pek chungchang a ni. Hei hi ram chungchang buai avanga kum tam tak tihkhawtlai a ni a, sorkar thar hian ni 45 chhunga he hna hi thawk zo tura hmalak a tum thu a ni.

West Bengal-ah hian sorkar laipui dan thar 'Bharatiya Nyaya Sanhita' (BNS) chu hman ṭan nghal a ni dawn bawk. Chief Minister chuan sorkar hmasain he dan hi kalpui duh lo mah se, dan leh hrai dik taka a kal theih nan sorkar thar chuan a bawhzui nghal dawn tih a sawi. Project dangte zingah hian tui tling laka Kolkata khawpui venhimna leh thingtlang kawngpui siamṭhatnate a tel bawk.