West Bengal LoP-ah Sobhandeb Chattopadhyay

Trinamool Congress (TMC) chuan Inrinni khan West Bengal Assembly-a Leader of Oppostion atan Ballygunge MLA Sobhandeb Chattopadhyay a ruat. Kum 82 mi, Chattopadhyay hi sorkar hmasa, TMC sorkarah khan agriculture leh parliamentary affairs minister a ni.

Kum 15 chhung Bengal-a sorkarna an chelh hnuah, TMC hian assembly inthlan neih zawh takah BJP a hneh zo ta lo a ni. India independence hnuah a vawi khatna atan Bengal-ah BJP sorkar a ding a ni.

Inrinnia thuchhuah an siamah, TMC chuan LoP bakah deputy leader of opposition atan Dhanekhali MLA Asima Patra leh Chowrangee MLA Nayna Bandyopadhyay te ruat an ni tih a tarlang. Kolkata Municipal Corporation Mayor leh Kolkata Port MLA Firhad Hakim chu Assembly-a TMC Chief Whip atan ruat a ni bawk. Hruaitu atana ruat tharte chuan Bengal mipuite tan theihtawpin an thawk zel dawn tih an sawi. Chief minister kal chhuak, TMC hotu Mamata Banerjee chu inthlanah a chak zawh loh avangin House-ah a ṭhu ve thei dawn ta lo.

West Bengal chief minister atan Suvendu Adhikar chu Inrinni khan lak luh a ni bawk. A rual hian a cabinet minister atan mi panga lak luh a ni. CM thar lak luh inkhawm hi prime minister Narendra Modi bakah union minister-te leh NDA sorkarna state-a chief minister-ten an telpui a ni. CM thar hian a advisor atan West Bengal-a electoral roll ennawnna, Special Intensive Revision (SIR) kalpuinaa poll panel special roll observer, IAS (retd) officer Subrata Gupta a ruat.