Chief of Navy Staff atan Vice Admiral Swaminathan ruat

Sorkar laipui chuan Vice Admiral Krishna Swaminathan chu Chief of Navy Staff atan Inrinni khan a ruat a, May 31-a chawl tur Admiral Dinesh Kumar Tripathi a thlak ang.

Vice Admiral Krishna Swaminathan hi Weste Naval Command-a Flag Officer Commanding-in-Chief nilai a ni. Flag officer-ah hian kum 1987, July thla khan a lut a, communication leh electronic warfare specialist a ni.A hnathawh ṭhat avangin chawimawina hrang hrang pawh a lo dawng tawh a, heng zingah hian Param Vishisht Seva Medal, Ati Vishisht Seva Medal, leh Vishisht Seva Medal te a tel. Operation lamah pawh chanvo pawimawh tak tak a lo chelh tawh bawk a; missile vessel INS Vidyut leh Vinash, missile corvette INS Kulish, guided missile destroyer INS Mysore leh aircraft carrier INS Vikramaditya te pawh a lo command tawh a ni.

Rear Admiral-a a kaisan hnuah Southern Naval Command, Kochi-ah Chief Staff Officer (Training) in a awm a, Indian Naval Safety Team dinna kawngah pawh mi pawimawh tak a ni. Flag Officer Sea Training-ah awm lehin, Sword Arm a command hnuah Flag Officer Offshore Defence Advisory Group leh Offshore Security and Defence advisor-ah dah a ni.

Vice Admiral Swaminathan hian Jawaharlal Nehru University, New Delhi aṭangin BSc degree zoin, Cochin University of Science and Technology aṭangin MSc in Telecommunications a zo. King’s College, London aṭangin Defence Studies-ah MA a zo a, Mumbai University aṭangin Strategic Studies-ah MPhil zoin, International Studies-ah PhD a ni bawk.