Trinidad-ah India siam agro-processing facility hlan

External affairs Minister S Jaishankar chuan Inrinni liam ta khan South Trinidad-a India puihnaa siam, thlai leh theite sawngbawlna hmun (agro-processing facility) chu a hlan. He hunah hian Trinidad and Tobago prime minister Kamla Persad-Bissessar pawh a tel.

He facility hi India sorkarin sumdawnna lian lo zawk leh la ṭhang mekte hmasawnna tura a duan, SEEDS (Supply of Equipment for Efficient Development of SMEs) hmalakna hnuaia siam a ni. External Affairs Minister chuan he hmalakna hian July 2025-a prime minister Narendra Modi-a'n ram hmasawnna tura thu a lo tiam tawh chu a tihhlawhtling tih a sawi. Trinidad and Tobago rama loneitute leh sumdawngte tan rahbi thar a nih tur thu a tarlang bawk.

Jaishankar chuan Penal khuaah rualbanlote tana ke lem leh kut lem siamna, Prosthetics Centre a hawng bawk. He centre hi India rama hlawhtling taka kalpui mek 'Jaipur Foot' kalhmang entawna din a ni a, rualbanlote tana hmasawnna lian tak a thlen beisei a ni.

EAM hi Caribbean ram pathum - Jamaica, Suriname leh Trinidad and Tobago tlawhin a zin kual mek a ni. A tlawh hnuhnun ber atan Zirtawpni khan Port of Spain hi a thleng a ni. Trinidad and Tobago PM Persad-Bissessar nen hian inkawmin, ram pahnihte thawh dunna tihchak dan tur leh hmasawnna ruhrel siam belh dan turte an sawidun.