Tamil Nadu CM thar atan C Jospeh Vijay la lut

Tamil Nadu assembly inthlan neih zawh taka hnehna changtu party, Tamilaga Vettri Kazhagam (TVK) president, filmstar hlui Vijay chu nimin khan Chief Minister tan rinawmna thu tiamtira lak luh a ni. Chennai-a Jawaharlal Nehru Stadium-ah lak luh inkhawm hi buatsaih a ni a, TVK hruaitu dang pakua pawh minister atan lak luh nghal an ni.

CM a nih hnua mipui hmaa a thusawi hmasa berah, Vijay chuan , "Vantirhkoh ka ni lo a, vantlang mi ve mai ka ni. In fapa leh in unaupa ang chiah ka ni," tiin inngaitlawm takin a inhmelhriattir. Politics-ah hausak duhna vanga lut a nih loh thu sawiin, mipui sum cheng khat pawh a eisak dawn loh thu leh eirukna lakah sorkar a fihlim tur thu a tiam bawk.

Hmeichhiate himna chu ngaih pawimawh hmasak ber a nih tur thu sawiin, , a thutlukna hmasa berah hmeichhe venhimna tur (women safety force) din leh kawlphetha a thlawna pek (free electricity)chungchang a sawilang nghal a ni.

Tamil Nadu inthlan neih zawh takah khan kum hnih liam taa din, TVK hian assembly seat 234 awmah seat 108 an la a ni. Sorkar siam tura seat ngai zat, 118 phak chiah lo mah se, party dangte thlawpna nen MLA 120 neiin sorkarna an siam thei ta a ni. Hei hi kum 60 deuhthaw hnua Tamil Nadu state-a DMK leh AIADMK tel loa sorkar siam a nih vawi khatna a ni a, state politics-ah hun thar a inhawng niin mi thiamten an ngai. Prime minister Narendra Modi pawhin CM thar Vijay hi lawmpuina a thawn a, Delhi aṭangin sorkar laipuiin a thlawp tlat tur thu a sawi bawk.