India company-te’n US-ah USD tld 20.5 invest dawn

India-a company lian tak takte chuan United States-ah sum tam tak invest an tum thu an puang a, a vaiin dollar tluklehdingawn 20.5 zet a tling pha. He thu hi tun hnaia Maryland, USA-a ‘SelectUSA Investment Summit 2026’ neihah khan puan a ni. Investment tih tur hian ram pahnih inkar sumdawnna leh thawh dunna pawh a tichak tura ngaih a ni.

Investment hi damdawi siamna, advanced manufacturing, energy infrastructure leh thiamna thar lamah tih tum a ni. Heng project-te hian ram pahniha mi tam tak tan hna thar an siamsak bakah, US-a thil siam chhuahna a tihlen chhoh pawh beisei a ni. India-a US Ambassador Sergio Gor chuan kum 2030-ah ram pahnih inkar sumdawnna hi USD tld 500-a tihpun hman an tum thu a sawi.

Investment hlawm lian ber hi damdawi siamna lam a ni a, USD tld 19.1 zet he sector-ah hian dah a ni dawn. Research leh development bakah, hmun thar din nan heng sum hi hman a ni ang. Hei bakah India company 12 chuan ‘greenfield project’ leh hna tihlenna turin USD tld 1.1 chuang an hman tur thu an puang bawk. Heng investment-te hian steel, connectivity leh energy lama hmasawnna a thlen thei dawn a ni.

SelectUSA Summit-ah hian India chu investment puang tam ber an ni. SelectUSA hian khawvel hmun hrang hranga investor-te chu US-a sumdawnna thar din turin a sawm khawm ṭhin a ni. Hma lakna thar hian hmasawnna leh thiamna thar a thlen bakah, hna thar tam tak siam a ni dawn tih thuneitute chuan an sawi.