INDIA bloc-in Delimitation leh Women’s Quota chungchang sawiho dawn

Eptu pawl intelkhawm, INDIA bloc hruaitute chu May thla laihawlah hian an ṭhukhawm leh dawn tih an tarlang. He ṭhutkhawmah hian 'women’s reservation' leh 'delimitation' (bial thar siam) chungchang an sawi ho dawn.

Eptu party-te hian Constitution (131st Amendment) Bill, 2026 chu Lok Sabha-ah lo dang tawh mah se, sorkar hian kawng dang zawngin he bill hi a put luh leh ngei rin a ni. Hei vang hian hmalak zel dan tur rel nghal an tum a ni. Bill hian hmeichhe tana seat 33% hauhna tur chu bial thar siam (delimitation) nen a thlunzawm tum nia sawiin, chu chu eptu party-te hian an duh lo hle a ni.

Sorkar laipui hian 2011 census tlawhchhana bial thar siam a, Lok Sabha seat pawh tuna 543 aṭanga 816-a tihpun a tum a; state tinah seat 50% vel zeta pung tura ruahman a ni. Hetih lai hian he ruahmanna hi Bill-ah chiang taka tarlan a nih loh avangin eptu lam hruaitute chuan rinhlelhna lian tak an nei. Congress party chuan hmeichhe quota hi tun dinhmuna seat awm sa (543) tlawhchhana kalpui nghal turin an phut.

Heng bakah hian, West Bengal election kalpui dan chungchanga Election Commission (EC) chet dan pawh ṭhutkhawmnaah hian sawi ho rin a ni bawk. Eptute chuan Chief Election Commissioner (CEC) Gyanesh Kumar chu thleibik nei leh awn lam nei taka thawkah puhin, a hna aṭanga bang turin notice pawh vawihnih lai an thehlut tawh a ni.