India leh China-in LAC chungchang Bishkek-ah an sawi dun

India leh China chuan an ram inrina, Line of Actual Control (LAC) a boruak muanawm a awm theih nan leh ram pahnih inkar boruak tihzângkhai a nih theih dan ngaihtuahin Kyrgyzstan khawpui Bishkek-ah inbiakna an nei.

Inbiakna hi Bishkek-a Shanghai Cooperation Organisation (SCO) Defence Ministers’ Meeting neih karlakah an nei a, defence minister Rajnath Singh leh China defence minister Admiral Dong Jun-ten LAC chungchang hi an sawi dun a ni.

LAC-a sipai tawlh kir tir chungchang leh hmun hrang hranga ram pahnih inkara innghirnghona boruak tihreh dan turte sawi lan a ni bawk. Rajnath Singh chuan LAC-a muanna a awm hma loh chuan ram hnih inkar inlaichinna a puitling thei lo tih a sawi nawn a; Admiral Dong Jun pawhin China chuan India nena an inkar boruak siamṭhat chu a duh thu leh inbiakna hmanga remna zawn zel a thlawp thu a sawi ve bawk.

Meeting-ah hian LAC boruak bakah West Asia dinhmun leh khawvel hmun hrang hranga inbeihna awmte pawh an thlir ho bawk. Rajnath Singh chuan firfiak achetna, 'terrorism' chu khawvel tana hlauhawm ber pakhat a nih thu leh, ram hrang hrangte an ṭanrual loh chuan terrorism hi an hneh dawn lo tih a sawi bawk. SCO member ramte chu firfiaka chetna chungchangah 'zero tolerance' policy nei turin a chah bawk a ni.

India leh China aiawhte inbiakna hian ram pahnih inkar boruak rit tak a chhawk zângkhai deuh tura beisei a ni. Hemi rual hian LAC-a hmun pawimawh ṭhenkhata sipaite inhnuhdawh dan tur chungchangah erawh thutlukna mumal tak erawh puanzar a la awm lo thung. Ram pahnihte hian military commander level-ah inbiakna kalpui zel an tum.