Ladakh-ah district thar 5 siam belhna LG VK Saxena in pawmpui

Ladakh Union Territory (UT) tana hmasawnna kawng thar sialna turin, lieutenant governor V K Saxena chuan Thawhṭanni khan district thar panga siamna tura hmalakna a pawmpui. District thar siam takte hi Nubra, Sham, Changthang, Zanskar leh Drass te an ni.

Heng district tharte nen hian Ladakh hian district pasarih a nei tling tawh dawn a ni. A hmain Buddish tamna, Leh leh Muslim tamna, Kargil district chauh a awm ṭhin a, hei vang hian sorkar hmalakna kawngah pawh harsatna a awm phah fo a, tualchhung mipuite chuan district thar siam tur hian hun rei tak an lo nawr tawh a ni.

L-G Saxena chuan he hmalakna hi prime minister Narendra Modi hmathlir 'Viksit Bharat' nena inmil a nih thu sawiin, "He thutlukna hian mipui ngenna a tihlawhtling a, tualchhung inrelbawlna leh sorkar hnathawh mipuite hnena thlen nan nasa takin a pui dawn a ni," a ti. Hmalakna hi kum 2024 August khan Union Home Minister Amit Shah-a kaihhruaina hnuaiah Ministry of Home Affairs chuan a lo pawmpui tawh a ni.

District thar siam hian ramri depa cheng leh hmun kilkhawr zawka awm, mipuite tana sorkar hma lakna a tisamkhai dawn a; hmasawnna hna, eizawnna leh kutkawih eizawnna kawngah pawh rah ṭha a chhuah beisei a ni.

Ladakh hian square kilometer 86,904-a zau ram a nei a, mihring cheng hi 2011 chhiarpuiah mi nuai 2.74 an ni. China leh Pakistan ram nen an in ri avangin district thar siam hi security leh administration kawnga thil pawimawh tak nia ngaih a ni bawk.