AAP-in party chhuahsantu MP 7 RS chair hnenah ban turin ngen

Aam Aadmi Party (AAP) chuan an party chhuahsana BJP zawmtu Rajya Sabha MP pasarihte chu MP an nihna aṭanga ban (disqualify) turin Rajya Sabha Chairman hnenah Pathianni khan ngenna an thehlut.

AAP hruaitu hlun leh Rajya Sabha MP Sanjay Singh chuan he ngenna hi Chairman C.P. Radhakrishnan hnenah a hlan a ni. MP pasarihte chet dan hi ‘anti-defection law’ tlawhchhana hma lak ngaihna a nih thu leh, mahni party phatsanna a nih thu a sawi a, an MP nihna hi hlih sak an ni tur a ni, a ti.

Kar liamta Zirtawpni khan AAP chuan an MP pasarih - Raghav Chadha, Ashok Mittal, Sandeep Pathak, Harbhajan Singh, Rajendra Gupta, Vikram Sahni leh Swati Maliwal-te chu an chan a ni. Heng MP-te hian Arvind Kejriwal kaihhruai party-in a dinna bul thuthlung leh kalphung hmasate a kalsan tawh nia puhin, BJP-ah anin sawn a ni.

He thil thleng chungchangah hian Raghav Chadha chuan thiam thu sawiin, Constitution-ah chuan party pakhata MP awm zat hmun thuma thena hmun hnih an nih chuan party dang nen an inzawm thei tih a sawi. AAP hian Rajya Sabha-ah MP 10 an neih avangin, pasarih an ban hian dan kalh a nih loh thu a tarlang.

Sanjay Singh erawh chuan Punjab-a mipuite duhthlanna zah lohna leh Constitution kalphung kalh a nih thu a sawi thung. Hemi chungchangah hian dan thiam, Kapil Sibal leh Lok Sabha secretary general hlunte an rawn tawh thu sawiin, "Dan tlawhchhanin heng MP-te hi disqualify theih an ni," a ti.

AAP chhuahsantu MP pasarih zinga parukte hi Punjab aṭanga Rajya Sabha-a tling an ni a, AAP chuan an party ticket-a tling si, party dang zawm leh mai chu mipuite laka rinawm lohna lian tak a nih thu an tarlang. Chairman-in he ngenna a dawn hi eng angin nge hma a lak dawn tih chuan ngaihven a hlawh hle.