BJP-in PM chungchang a sawi danah Congress hotu laka action lak phut

Bharatiya Janata Party (BJP) chuan Congress president Mallikarjun Kharge-a'n prime minister Narendra Modi chungchanga a sawinaah 'firfiak' (terrorist) tih a hmang chu na taka sawiselin, a laka action la turin Election Commission an phut.

Election Commission-a BJP chuan complaint an theh lut a, Kharge thusawi dan chu Model Code of Conduct (MCC) bawhchhiatna a ni, an ti. 'Inthlan neih tur avanga khawvela party lian ber hruaitu leh ram chhunga political leader langsar ber firfiak tia chu tawngkam uchuak tak leh poll code bawhchhiatna lian tak a ni," tiin an tarlang. Kharge chu mipui hnena ngaihdam dil a, a thusawite sut leh turin an phut. Inthlan campaign a neih lehna turah pawh a laka khuahkhirhna siam turin EC chu an ngen a ni.

Kharge hian assembly inthlan neihna tur, Tamil Nadu khawpui, Chennai-a Thawhlehnia press confernce a neihah,AIADMK leh BJP thawh dunna chu sawiselin, PM chu 'firfiak' tiin a saw a ni. Mahse a thusawi chungchang sawifiah tura an tih hnuah, Congress president chuan PM a sawina chu ram chhung democracy kalphung hlauthawnawm takah a dah (terrorising) tia a sawina zawk a nih thu a tarlang a ni.

BJP president Nitin Nabin pawhin Congress party chu an party hotu thusawi avang hian ngaihdam dil turin a lo phut tawh bawk a, "Prime Minister chungchanga sawina atana 'terrorist' tih hman chuan Congress politics khelh dan tlakchhiat zia a tilang a ni. Hei hi mimal pakhat chungchang sawina ringawt a ni lo a, India ram mipui tld 1.4 te hmusitna a ni," a ti.

MCC bawhchhia PM puhna complaint lut a tam

BJP-in Congress party president laka complaint an theh luh lai hian, prime minister Narendra Modi pawh ram mipui tana thuchah a neih chungchangah Code of Conduct (MCC) bawhchhiatna a awm nia sawiin, ram chhunga activist, civil society hruaitu leh mithiam 700 chuang chuan Election Commission hnenah complaint an theh lut ve bawk.

Thawṭanni khan complaint hi theh lutin,thil awmzia chhui chiang tur leh Prime Minister thuchah hi official record leh sorkar website aṭanga paih bo nghal turin an phut a ni.

Mi 714-te complaint thehluhah hian, April 18-a Prime Minister-in hmeichhiate tana 'women’s reservation' chungchang a sawi kha inthlan hmaa vote zawnna leh party propaganda anga hman a nih thu an tarlang. Hemi chungchang a sawi dawn hian Election Commission hnen aṭangin phalna a la hmasa em tih an zawt a, phalna lak hmasak a nih loh chuan MCC bawhchhiatna lian tham a tling tih an sawi. "Sorkar hian EC phalna thlapa thu sawina hi an nei a nih chuan, national media-ah political party dangte pawh an ngaihdan sawina hun pek ve tur an ni," tiin an lehkhaah an tarlang.